Portugal para nós
Hoxe, 25 de abril, a biblioteca converteuse en sala de cine e orientamos a pantalla cara a Portugal. O 1º Ciclo de Cinema Português tróuxonos a proxección en versión orixinal do filme Adeus, pai!, do director Luís Filipe Rocha.
Ao remate, case sen tempo para falarmos do filme (ver comentario de profedelengua), pedimos apuradamente unha resposta á cuestión Que é para ti Portugal? A palabra máis empregada foi esa na que todos estamos a pensar: veciños. Pero na relación de veciñanza destas terras da raia atopamos moitas visións, desde o prexuízo á familiaridade. Lembramos que unha significativa porcentaxe do noso alumnado ten orixe familiar lusitana. Todo isto e máis é Portugal para nós:
Ese veciño que ves ao abrir a ventá da túa casa.
Gústanme moito os monumentos que teñen de épocas pasadas.
Portugal é un país triste.
Portugal é un lugar para viaxar e divertirse.
Eu non o considero outro país, senón que o vexo como unha parte de Galiza, unha parte que podemos visitar sempre. Para min é algo simbólico e precioso.
Portugal é un país con costumes antigos. Manteñen o pasado no seu presente.Um país bom!!!
Non me gusta como conducen.
Portugal é a terra do cariño.Fermosa terra, pero supoño que tamén terá lugares feos.
Un pobo veciño, que consideramos estranxeiro, cun idioma diferente, pero á mesma vez parecido ao galego. É fácil entendernos.
Onde imos ir de excursión de fin de curso.
A terra dos meus primos.
Para min é o pobo natal da miña nai. Sen Portugal eu non sería a persoa que son. A vida éche así.
Un país pegado ao meu.
O meu país.
