Concurso de marcapáxinas

Pouco a pouco iremos engadindo a maioría dos marcapáxinas.

Haikús das estacións

Haikús escritos por ISMAEL PALANCA TORO (4º. ESO), primeiro premio no certame de poesía Xosé Carlos Caneiro Pérez do Concello de Verín.

Imaxes con licenza CreativeCommons (1, 2, 3 e 4)

I Romaría Popular das Letras Galegas (19 de maio)

Conecta o son para escoitar as Cantadeiras do Baronceli.

Cumpriuse o obxectivo de xuntar por unha vez a toda a comunidade educativa nunha actividade festiva, sen perder de vista o sentido cultural da celebración das Letras Galegas. Alumnos, profesores, pais, persoal non docente e representación municipal cumprimos o programa previsto.

O alumnado foi o principal protagonista. Vaia o noso aplauso a todos eses voluntarios/as que se apuntaron a ensaiar durante os recreos para cantar, bailar, recitar poesía e interpretar teatro. Tamén aos 17 participantes do Concurso de Larpeiradas que puxeron o seu esforzo (e o da súa familia) en adozarnos a xornada. Axiña publicaremos e gardaremos na biblioteca as vosas receitas. Asemade, os resultados do concurso de marcapáxinas merecerán unha próxima análise máis polo miúdo.

O outro portagonista foi para nós, con permiso de Álvarez Blázquez, Xesús Taboada Chivite. Agardamos que a retransmisión radiofónica de Onda Cero-Verín da inauguración da aula que a partir de agora levará o seu nome, fose tan emotiva como en directo. Foi un honor contar no noso instituto coa presenza dos fillos do gran intelectual verinense que nos lembraron o valor que o seu pai lle concedía á formación rigorosa no estudo e á aprendizaxe persoal.

Subscribimos as palabras do profedelengua, que na súa crónica da xornada remata con estas palabras que moito agradecemos:

"Eu, dende logo, apúntome a unha II Romaría Popular agora mesmo, pero o que é
máis importante, apúntome a un instituto que aínda que pequeniño, amosa tanta
vitalidade, creatividade e entusiasmo por facer cousas novas. Un placer
compartir a nacionalidade baronceliana con todos vós."

Ademais da animación anterior coa que inauguramos a nosa canle YouTube, non perdas a reportaxe fotográfica completa (70 fotos de Israel).

Podcast IES Castro de Baronceli

Podcast: emisión radiofónica a través da internet

Os alumnos da materia de Informática de 4º da ESO
veñen de gravar un podcast en inglés sobre os seus
grupos musicais preferidos.

Para escoitar ou descargar os podcast
fai clic no seguinte enlace:
Podcast do IES Castro de Baronceli

Subscribe Free
Add to my Page

A vida nun tarro (Irena Sendler, in memoriam)

Foto: Mariusz Kubik

Onte Antía deu na clase a nova: “Profe, morreu Irena”. Viña en todos os xornais a súa foto de boa persoa, como dixeran cando a coñecemos grazas á presentación que os de Historia colgaran na páxina do departamento.

Irena Sendler salvou a máis de 2.500 nenos xudeus durante a II Guerra Mundial. Rescatábaos do gueto de Varsovia para evitar o seu traslado aos campos de concentración. Empregou todos os medios que tiña ao seu alcance para agachalos: cestos do lixo, sacos de patacas, cadaleitos…. Os pais só formulaban unha pregunta sen resposta: “Podes prometerme que o meu fillo vivirá?”
Non llo contou a ninguén, pero rexistraba a identidade dos cativos e soterraba os papeis en tarros baixo a maceira dun veciño. Ata que foi descuberta polos nazis, torturada e condenada a norte. A sentenza nunca se cumpriu porque un soldado, subornado pola Resistencia que non quería que Irena morrese co segredo dos tarros, a deixou escapar.
Grazas a aqueles tarros baixo a maceira, trala guerra ela mesma localizou os nenos e colocounos con familias adoptivas. Nunca se considerou unha heroína, pero para todos os da clase de 4º.D si. “Un heroe de guerra é unha persoa que, ademais de salvar a súa vida, intenta salvar a dos demais”, escribiu hoxe Antía no seu exame sobre a II Guerra Mundial.

Enlace recomendado: http://irenasendler.org/ para coñecer o proxecto

Life in a Jar do que axiña haberá película.

Maios 2008

Aquí chega o maio
co canto do cuco.
Nós coma sempre
vimos ao instituto.

Vivimos en aldeas
nas que só hai vellos,
somos sete rapaces
en trinta concellos.

As prazas do Concello
cotízanse moi alto,
pero a da biblioteca
deu o gran salto.

Manda o narcotráfico
na vila de Verín,
ata apañaron
un Garda Civil.

O chiki-chiki
vai a Eurovisión
e algúns políticos
van a "comisión".

As coplas dos maios máis "ácidos" dos últimos anos xa se poden baixar da rede en formato pdf. No blog do ENDL pódense ver as fotos da súa elaboración e exposición na Praza do Concello.

(Maios do ano pasado).

Libros nos carteis da II República

Os libros, a lectura e a loita contra o analfabetismo nos carteis da colección do
Arquivo Xeral da Guerra Civil Española.

Día do Ensino na casa de Ruvem Alves

Artigo 7º.- Días non lectivos

3. Ademais dos anteriores, sen prexuízo do establecido no artigo 8º.2. e co fin de unificar a celebración dos patróns de cada nivel educativo, establecese o Día do Ensino coa consideración de non lectivo para os efectos académicos e que no curso 2007/2008 se celebrará o 2 de maio de 2008. (DOG, 16/4/2007)

Á busca de información sobre o motivo que nos permite hoxe, 2 de maio, folgar coa celebración do Día do Ensino, podemos achar unha literatura máis amena que a do Diario Oficial. Se seguimos o fío do buscador de internet alegría+ensinar, imos bater co título dunha obra de Ruvem Alves. Segundo a wikipedia, psicoanalista, educador, teólogo e escritor brasileiro que conta cun espazo propio na rede: A CASA DE RUVEM ALVES.

Que cada quen entre polas portas do Carpe Diem ou o Tempus Fugit, visite o Quarto dos Badulaques, o Quarto da Poesía, a Cozinha ou fique no Jardim. Das súas conversas cos educadores, quedo agora co final do artigo O prazer da leitura:

Ler é fazer amor com as palavras. E essa transa literária se inicia antes que as crianças saibam os nomes das letras. Sem saber ler elas já são sensíveis à beleza. E a missão do professor? Mestre do kama-sutra da leitura...