7/6/12

Recapitulando...

Chegamos a fin de curso, e con el, o tempo das conclusións, das reflexións. Por iso unha das cousas das que botamos man para facer a memoria de actividades da Biblioteca son as estatísticas do Programa Meiga, o programa de xestión bibliotecaria que temos na nosa Biblioteca. E adiviñade que... Este ano (e todavía falta un pouquiño para fin de curso), os empréstimos de libros foron un total de 778!!!!!!! Nun instituto de 140 alumnos e 27 profesores!! Dende o Equipo da Biblioteca sentímonos moi orgullosos de todos vós, xóvenes lectores. Noraboa!!


18/5/12

Marcos Calveiro, no Baronceli

Hoxe venres 18 de maio visitou o Baronceli o escritor especializado en literatura xuvenil Marcos Calveiro, nunha iniciativa do Departamento de Lingua galega. Foi unha oportunidade única para falar co autor de O escritor do sombreiro de malvas, novela que moitos alumnos xa tiveron a ocasión de ler.



11/5/12

A caravana de "Vilamor" chega ó Baronceli

A caravana de Vilamor -a última película de Ignacio Vilar, con Rubén Riós de protagonista- chega o luns 14 ó Baronceli. A caravana chega nunha nova etapa da súa viaxe promocional por Galicia, e desenvolverá unha actividade especial no Instituto. Un bo aperitivo para a inminente Romaría das Letras Galegas.



30/4/12

Continuando co ciclo de curtametraxes de animación

Seguimos no recreo dos luns, ás 15:00 horas, co ciclo de curtametraxes de animación que, a verdade e que está a contar co apoio do público, é dicir, dos alumnos, que cada luns acoden á aula de audiovisuais para mirar a correspondente "película"... Despois de proxectar curtas coma El viaje de Saïd o Birdboy, hoxe foi turno de La leyenda del espantapájaros.

 

  

  

26/4/12

Mafalda dice...

Sesión de contacontos

Hoxe os alumnos, coma colofón da Semana do Libro, participaron nunha sesión de contacontos a cargo do profesor e narrador Xosé Manuel Neira. Unha auténtica gozada disfrutar das súas historias. Volve visitarnos pronto, Neira!

Teatralización del Lazarillo de Tormes

Hoy tres alumnos del IES Taboada Chivite nos visitaron para representar unas breves escenas del Lazarillo de Tormes, con motivo de nuestra SEMANA DEL LIBRO. Muchísimas gracias a Pedro (el ciego), Alejandro (Lazarillo) y Belén (apuntadora), que trasladaron por unos momentos a las aulas el máis auténtico siglo XVI.

Podéis ver las imágenes aquí.

24/4/12

Gañadora do concurso de pistas 2011/2012

Xa temos gañadora do xogo de pistas deste curso! Trátase de Marina Freitas Toro, alumna de 3º B, que tras dura pugna queda co premio de 50 euros canxeables en diverso material educativo, deportivo, musical ou informático. Moitas felicidades!

23/4/12

Exposición de libros antigos

Hoxe celebramos no Instituto o Día do Libro cunha magnífica exposición de libros antigos, organizada pola Biblioteca. Gracias ás persoas que amablemente colaboraron aportando libros, profesores e alumnos puideron admirar exemplares tan valiosos coma un facsímil dun libro de 1496 feito na imprenta do castelo de Monterrei (a primeira de Galicia), un misal de 1780, unha edición do 'Quijote' de 1832, diversos libros de texto, gramáticas e diccionarios de finais do século XIX e principios do XX, novelas varias publicadas en Francia e España, un número da revista 'Blanco y Negro' de 1925... Unha oportunidade excepcional para aprender e disfrutar de auténticos tesouros bibliográficos.






17/4/12

Cousas que facer cun elefante

Cineclube do Baronceli


Xa comezaron as proxeccións do cine-clube. Tódolos luns, ás 15:00 horas, unha curtametraxe animada...


PROGRAMACIÓN do próximo mes:

Curtas de PIXAR.
Birdboy.
El viaje de Saïd.
Curtas dos Simpsons.
...

27/2/12

"O disfrace", de Leticia Colmenero Martínez, microconto gañador do II Certame de Microrrelatos

Xa hai gañador do concurso de microrrelatos. Noraboa, Leticia!

O DISFRACE

Hai moitos anos en Verín había un neno que, cando chegaba o Entroido, púñase moi triste, porque non sabía coma facer o seu disfrace. Como non sabía facer ningún disfrace, pois non ía disfrazado ó Entroido, e a xente ríase del. O neno botábase meses pensando como ía facer o seu disfrace, pero non se lle ocurría nada.
Ata que un ano rendiuse.
Pasaban os anos e el non ía ó Entroido, e cada ano que pasaba, máis enfadado estaba, porque el estaba só en casa mentres que o resto da xente se estaba divirtindo no Entroido. Tanto chegou a enfadarse que pensou que podía coller un pau e atar un cinto na punta. E cando a xente estivera vendo o desfile, el iría pegándolle á xente co cinto. Pero tiña un problema, que era que a xente ía descubrir a súa identidade; entón decidiu facer unha careta con madeira. A medida que pasaba o tempo, el íalle engadíndolle cousas novas ó disfrace.
Ata que chegou o Entroido.
El desenvolveu o seu plan coma tiña pensado. Todo lle saiu como el o pensara, excepto unha pequena cousa, que era que el foi o que levou o mellor disfrace que nunca se levara ó Entroido. El deuse de conta de que foi capaz de facer un disfrace e dende aí non se perdeu ningún Entroido. E así foi como apareceu o peliqueiro no Entroido.

Leticia Colmenero Martínez, 2º A

27/1/12

Concurso de microrrelatos

A Biblioteca convoca o II Certame de Microrrelatos. Esta vez o concurso será de "contos de Entroido": os microrrelatos deberán ter como tema, directa ou indirectamente, o Entroido. O gañador levará un premio consistente nunha comida-degustación dun típico cocido galego nun afamado restaurante da comarca. Dende eiquí animamos a participar a todos. Atentos ás bases, que podedes consultar on-line na seguinte ligazón.

13/1/12

Clases de xadrez na Biblioteca



A Biblioteca organiza unhas clases para todo aquel que queira aprender -ou perfeccionar- a xogar ó xadrez. O cursiño sería no recreo dos luns, despois de comer. Os que esteades interesados, apuntádevos na mesma Biblioteca, no papel que hai no corcho...

Novidades

Os Reis tráennos algunhas novedades editoriais: Donde los árboles cantan, de Laura Gallego, e Rubí, de Kerstin Gier. Ah! E tamén Mi hermana vive sobre la repisa de la chimenea, de Annabel Pitcher... Correde que voan!

16/12/11

14/11/11

Xogo de pistas

Unha nova edición do xogo de pistas... Apúntate á unha auténtica proba de fondo para os teus coñecementos e as túas habilidades de busca de información...

Promo das últimas novidades na Biblioteca

Dámoslle publicidade os últimos éxitos de narrativa xuvenil que xa están nas estanterías da nosa Biblioteca (ben, en realidade, a día de hoxe xa están todos emprestados). Trátase da afamada novela xuvenil da escritora española María Fernández-Ponte, Nunca seré tu héroe, e de Traición, de Scott Westerfeld, o primeiro libro dunha tetraloxía que fai furor nos Estados Unidos.









4/11/11

Concurso de Sudokus




A Biblioteca organiza o I Concurso de Sudokus do Baronceli, unha excelente oportunidade para que todos amosedes a vosa lóxica e pericia cos números, ó mesmo tempo que pasades un bo rato. Participade!

6/10/11

Xogos para a Biblio

Comezamos o novo curso fornecendo a Biblioteca de xogos coma o trivial, o intellect, o rummikub... Coñéceos e disfrútaos!

23/9/11

Botánica

O último trimestre do curso 2010/2011 o equipo da Biblioteca deseñou unha serie de actividades que xiraron ó redor da botánica. A idea motriz foi darlle impulso á noción da biblioteca como un recurso interdisciplinar de apoio ós distintos departamentos didácticos. O primeiro tema que se nos ocurriu, pois, foi a botánica, e esperamos que a este sigan outros tales coma xeografía, zooloxía, música, etc. Así que empezamos por ambientar a sala. O primeiro que fixemos foi "plantar" poemas que falaran de botánica, e así quedou a cousa...






...e, por suposto, seleccionar libros de botánica e polos no expositor para que quedaran ben visibles e os rapaces se animaran a coller algún en préstamo...





O seguinte paso foi facer na biblioteca (e fora dela) espazos divulgativos: os cactus, as árbores, as flores, as froitas, as verduras... A gracia era, naturalmente, dar as pertinentes explicacións ó lado de exemplares vivos...







Algún mensaxiño, de paso, que calara nos rapaces de xeito fácil e animara a súa conciencia medioambiental...







Tamén animamos ós alumnos a traer cadansúa planta...



En xeral, pensamos que a experiencia foi positiva e serviu para dinamizar da Biblioteca, a pesares de que non nos dou tempo a levar adiante actividades que tiñamos preparadas ou en vías de preparación, coma unha sesión de busca de información relacionada coa botánica, ou un concurso de fotografía botánica, cousas que esperamos facer no recén inaugurado curso.

19/5/11

Biblioteca do CEIP Castiñeiro de Laza

Unha maravilla o que están a facer os responsables da Biblioteca dun pequeno colexio da comarca, o CEIP O Castiñeiro de Laza. Ánimo e a seguir así.

Blog Biblioteca CEIP O Castiñeiro (Lhttp://www.blogger.com/img/blank.gifaza)

1/3/11

Promo "Perdona si te llamo amor"

Auténtico furor. Perdona si te llamo amor, o libro de Federico Moccia, xa é con diferencia o gran éxito en préstamos no Baronceli neste curso 2010-2011. Non sabemos canto de mérito ten Iker Casillas neste boom, pero o certo é que a historia de Niki e Alessandro enganchou ben enganchado. Tanto foi así que os alumnos pediron máis, e para satisfacer a demanda, dende hai un par de semanas, Perdona pero quiero casarme contigo, Tengo ganas de ti e A tres metros sobre el cielo xa están nas estanterías ao dispor de todos na Biblioteca. A por eles que voan!


Promo "Perdona si te llamo amor"

25/2/11

É tempo de lírica

No IES Castro de Baronceli é tempo de lírica. O Equipo da Biblioteca organizou unha actividade temática coa poesía lírica coma protagonista, iniciativa que ten coma obxectivo acercar os alumnos á poesía, quitar esa especie de medo natural que parece que lle teñen os máis xóvenes. O lema elixido para concienciar de que a poesía forma parte das nosas vidas é: "Dis que non che gusta a poesía; e logo, as letras das cancións, que son?". Algunhas columnas do Instituto foron decoradas con letras de cancións dos solistas e grupos musicais máis escoitados do momento, e os alumnos teñen oportunidade de colgar as letras das súas cancións favoritas.
Paralelamente, na Biblioteca exponse unha selección de libros de poesía, que conta con autores xa clásicos coma Neruda ou Bécquer, entre outros.

Tamén se lle entregou a María Peña Damorín o premio correspondente ao concurso de poesía amorosa, organizado co galo do día de San Valentín: unha cena para dous persoas nun restaurante de Verín e que foi un éxito de participación. Merecido o premio para María, coma podemos ver nos versos do seu poema, que está ademáis exposto no chan, diante das escaleiras, para que todos poidan lelo e mesmo pisotealo ;-)


Exposición de carteis



Estas son as imaxes da exposición de carteis "Amores para a historia, as mellores historias de amor", organizada co galo do San Valentín. O alumnado ten a oportunidade de votar os mellores carteis.